Startseite | Husch-Husch | Fotos | Amateurfunk | Impressum

Dä verhengerte Zoobesök

Et Alwine Seepenspohn wor en stabil Fraumensch, wat got an gään tweienhalf Zentnersch "Lewendgewicht" met seck römpöngeln maut. Besongersch seitdem sinnen Kääl an treuen Schluffen, de Fennand, gestorwen wor, hattenet noch mehr Kummerspeck aangesatt.Natürlech däten ok noch diverse "Koffekränzkes" ehr Deel dobie, dat et sin Gewicht heel, van "Affnehmen" kohn nit de Rede sin. So nohm et seck dann eenes Dages vör, doch ens en böttschen mehr tu lopen. Bim "Beenvertreden" köhn et vielleicht wat schmaler weren.

Getreu dösem Vörsatz beschloot et eenes Nommedags, dörch den Zoo tu marschieren. Vörher hattenet noch de Nobersche Bescheed geseit, wedn jömmes vanne Kränzkesschwestern köhm, dat et nom Zoo ongerwegs wör. Dann tippelten et de "Schwatte Beek" ronger, nom Owerbarmer Bahnhoff an lösten seck am Schalter en Fahrkaate. Mette Schwewebahn wor ein dat doch tu beschwörlech, wegen de völlen Trappen, die et hätten stiegen möten.

Et woren knapp twei Stongen vergangen, as et Alwine enne "Schwatte Beek" de Husdör alt weer opschloot. De Nobersche, die grad enkopen wohl, begegneten ein enne Trappe an frogten ganz erstaunt: "Awwer Frau Seepenspohn, sendse dann schon weer tureu? Se möten jo ein Lopschrett dörch den Zoo gewetzt sin?!"

Japsend wenkten et Alwine aff: "Nee, Frau Piepenkötter, ein Zoo, wor eck gaanit. Wat sie eck froh, dat eck weer tu Hus sie. Oppe Henfahrt wohl eck am Zoo uutstiegen. Wie se weeten, mott eck doch emmer de Trappen "röckwärts" ronger gonn, weil eck "vorwärts" so schwindelig werd'.

As eck nu ein "Krebsgang" uut dem Zoch kletterten an meck dobie reits an lenks aan dem Waggong-Dörrahmen fastheel, kohm dä Schaffner. Eh' dat eck öwwerhaupt en Woat ruutkreeg, goof dä meck en kräftigen Den gegen den Hengerschten an eck stong wier ein Abteil! - Rrrrrrommtns, schmeete de Dör tu, weile woll glöfften, meck bim "Enstiegen" geholpen tu han?! Schon hoof hä de "Kelle", Trrrrrrrrr mackten sinne Trillerflöte an use Zoch satten seck en Bewegong, Rechtong Vohwenkel. Ade du schöanen Zoo!

En Vohwenkel kohm eck twar ruut an ennen Zoch noh Owerbarmen ren. Am Zoo passierten meck awwer dat glieke Malör. Do kohm en jongen Kavalier an "holp" meck, dä eck uutstiegen wohl, ok bim "Enstiegen". Den wohl eck nu kinnen Korf gewen, wo de charmanten Kavaliere sooo rar send!"